حوار بين اثنين سمعهم تقيل
تخيلوا لو اتنين سمعهم تقيل اتكلموا مع بعض!! . ايه اللي ممكن يحصل ؟ تعالوا نشوف اتنين من دول، واقفين على محطة الاتوبيس ودار بينهم الحوار ده
هادي : الاتوبيس ده بيروح مــصر الجديدة؟
شادي : على الحديدة !!... ليه انت طالب احسان
هادي: بذرة الكتان !! لا ..دي تلاقيها عند العطار
شادي : جزار!! اه ..قول كده .. عايز تشتري لحمة
هادي : معاك حق.. الدنيا زحمة ..علشان ده ميعاد خروج الموظفين
شادي : نور الدين !! لا والله .. ماعرفوهش
هادي : ما بتشربوش!! ليه ..كفا الله الشر
شادي : رأس البر !!! ..ده مــصيف هادي
هادي.: عايز تركب للمعادي... دي منطقة جميلة
شادي : بليلة !! انت شكلك كده جعان
هادي : عيان!!! أه والله .انت باين عليك عيان ..طيب ما تروح للدكتور
شادي : الحنطور!! ده احسن من الأتوبيس ، وبيوصلني لحد الباب
هادي : هبــــاب !!! وانا اللي كنت فكرك محترم
شادي : اتخـرم !! هو مين ؟؟
هادي : عاوز اسـبرين ! ليه انت عندك صداع ؟
شادي : قراع !!! ينهار اسود . ده مرض خطير
هادي : لا والله مش عايز. وبعدين مش بأحب الفطير. تقيل على المعدة وتمنه غالي
شادي : خالي.. انت تعرف خالي ؟ ده راجل كبير في السن
هادي : الجن .. نهارك مش فايت ..انت عليك عفريت .!؟
شادي : لا والله ..ممعاييش.. انت عايز الكبريت ليه . عايز تولع؟
هادي : أدلع ! أدلع عليك انت!؟ انت ما تملاش عنيا
شادي :يقبضوا عليا !! ليه !؟
هادي : انت غريب يا راجل انت..شكلك شحات ، (يدفعه من القميص) روح اشتغل شغلة تاكل منها عيش
شادي : خيش!! والله ده صوف انجليزي
هادي : بنتك زيزي!!! ربنا يخلي...
شادي: أنتاج محلي .!!!! ده مستورد
يمر شاويش من بتوعنا ... يلفت انتباه الحوار، : بتعمل ايه يا جدع منك له!!!
هادي وشادي: ايوة يا شاويش ...احنا مستنين الأتوبيس
نهاركم مش فايت .... جواسيس !!! قدامي على القسم